Laugardaginn 19 apríl s.l., fór fram hið árlega Drottningamót ÍR og Olís. Drottningamótið er mót sem ætlað er knattspyrnudrottningum sem náð hafa 25 ára aldurstakmarkinu og spila ekki með meistaraflokkum félagsliðanna. Í ár var reyndar boðið upp á prinsessu riðil með dömum sem ekki höfðu náð hinu langþráða aldurstakmarki en var leyft að vera með vegna hinnar alþekktu góðmennsku drottninganna. Í ár mættu til leiks 14 lið, þar af þrjú í prinsessuriðlinum. Þarna var á ferðinni ansi fjölbreyttur hópur kvenna, sem hefur gaman af að spila fótbolta og skemmta sér í leiðinni í góðum félagsskap og svo náttúrulega ein og ein sem var bara þarna til að vinna. Mörg þekkt andlit úr knattspyrnusögunni mættu til leiks og sýndu og sönnuðu að þær höfðu engu gleymt og var það almannarómur meðal áhorfenda að hér svifi hinn rétti knattspyrnuandi yfir vötnunum og gleðin í fyrirrúmi.
Flautað var til leiks upp úr hádegi og svo leikið af fullum krafti fram til að ganga 18. Á milli leikja var hægt að hvíla lúin bein og gæða sér á veitingum á kaffihúsi mótsins, Cafe Royale, þar sem boðið var upp á vöruúrval sem var við drottninga hæfi.
Veðrið lék við hvern sinn fingur þennan dag og leikirnir fóru að mestu leyti fram af mikilli prúðmennsku og því nánast ekkert að gera fyrir sjúkralið keppninnar, sem er hið besta mál.
Eftir mikla keppni og margar svitaperlur fór svo, að til úrslita í mótinu léku drottningar frá KR, við drottninga lið Skagakvenna ÍA. Þetta var æsispennandi úrslitaleikur og það voru að lokum KR drottningar sem stóðu uppi sem sigurvegarar.
Að leik loknum var safnast saman á Cafe Royale, þar sem boðið var upp á léttar veitingar og sigurvegararnir leystir út með verðlaunapeningum og gasgrillum/pönnum frá Olís. Veittar voru hinar ýmsu viðurkenningar og að lokum var dregið um glæsilegt gasgrill frá Olís úr hópi þátttakenda.
Um kvöldið var síðan safnast saman aftur, í danssal drottninganna, í ÍR heimilinu og þar var dansað og djammað fram eftir, í góðra vina hópi.
Til að halda svona mót þarf góða að og ber að þakka eftirtöldum aðilum stuðninginn: Olís sem aðalstyrktaraðila mótsins, Bakarameistarinn, Landsbankinn, Vífilfell, Innnes, Selecta, Rekstrarvörur og Hollt og Gott.
Mótið verður haldið á sama tíma að ári og er ætlun þeirra sem að mótinu standa, að efla það og stækka á alla vegu.
Myndir frá mótinu eru í myndasafninu hér til hliðar